ખોટું કોણ?

Posted by: Govind Prajapati Category: પ્રેરક પ્રસંગો Comments: 506

                     ખોટું કોણ ?

  કામાવીરા પ્રા.શાળા

    આજે હું ધોરણ 5 વર્ગમાં ભણાવવા ગયો. મારાં વર્ગમાં દાખલ થતાંની જ સાથે બધાં વિધાર્થીઓએ ઉભા થઇને નમસ્કાર કર્યા. મેં પણ તેમનું અભિવાદન કર્યું અને તેમને બેસવાનું કહ્યું. આમ કરીને મેં બ્લેક બોર્ડ પર વિષય- પર્યાવરણ અને વિષયાંગ-ઋતુઓની સમજ એમ લખ્યુ. લખીને પાછળ ફર્યો તો જોયું કે મારી પાછળ એક વિધાર્થી, નિલેશ ઉભો હતો.
એને ઉભેલો જોઈને મને થયું કે કંઇક કામ હશે અથવા એને બહાર જવાની રજા જોઈતી હશે. મેં એને પૂછ્યું કે હજુ તો વર્ગ શરુ જ થાય છે ત્યાં જ તારે શેની રજા જોઈએ છે. પણ એણે વળતો જવાબ આપ્યો કે, “સાહેબ, મારે રજા નથી જોઈતી પણ એક વાત પૂછવી છે.” હું એના ચહેરા પરના હાવભાવ સમજી ન શક્યો, એના ચહેરા પર દુઃખ, લાગણી અને ભાવનો સંગમ જોવા મળતો હતો. પણ હું કઈ બોલું તે પહેલાં તો નિલેશ બોલી ઉઠ્યો, “સાહેબ મારે કંઈક કહેવું છે.” મેં કહ્યું, “હા બેટા, બોલ શું કહેવું છે?” નિલેશે કહ્યું, “સાહેબ માફ કરજો, પણ કાલે તમે અમને ખોટું શીખવ્યું.”
નિલેશ એટલું બોલ્યો ત્યાં જ હું તો આશ્ચર્યમાં પડી ગયો! થોડી જ ક્ષણોમાં મારા ગઇ કાલના દિવસનું પુનરાવર્તન થઇ ગયું. જેમાં મેં કંઈ પણ ખોટું શીખવ્યું હોય એવું કંઇ જ યાદ ન આવ્યું. તો પણ મેં ધીમા અવાજે નિલેશને પૂછયું, “બેટા મેં શું ખોટું શીખવ્યું? જરા કહે તો.” તરત જ નિલેશ બોલ્યો સાહેબ તમે કાલે શીખવ્યું હતું કે શિયાળામાં ઠંડી પડે, ઉનાળામાં ગરમી પડે અને ચોમાસામાં વરસાદ પડે છે. પરંતુ અત્યારે તો શિયાળો છે અને તો પણ બહાર વરસાદ પડે છે. આટલું બોલતા નિલેશની આંખો નમ્રતાથી નીચે ઝુકી ગઈ.
હું વિચારતો જ રહી ગયો. મને આ વિધાર્થીની સમજ અને મેળવેલ માહિતીને યોગ્ય રીતે સમજવાની શકિત પર આનંદ પણ થયો. પણ સાથે એ પ્રશ્ન થયો કે “હે ભગવાન તું કેવો છે? એક સમય માટે ગોવિંદ કરતા ગુરુ મોટો હતો અને એ ગુરુને આજે તે ખોટો સાબિત કરી દીધો! એ ઈશ્વર તું જ કહે હવે આમાં ખોટું કોણ હું, બાળક કે તું ?”
પણ બીજે જ ક્ષણે મારા અંતરાત્મામાં બેઠેલાં ઇશ્વરે મને પાછો જવાબ વાળ્યો કે, “ભાઇ, નથી મારું ઋતુચક્ર ખોટું કે નથી તે ભણાવ્યું ખોટું. ખોટું તો એ આચરણ છે જેને લીધે કુદરતનાં નિયમો અને શીખવેલ જ્ઞાનને પણ ખોટું સાબિત કરી રહ્યું છે. માણસ તરીકે તારે તારાં આચરણને સુધારવાની જરુર છે જેથી પ્રકૃતિ પોતાનાં નિયમોથી અવિરત ચાલતી રહે.”
મને બીજી જ પળે સમજાઇ ગયું કે મારે ખાલી પુસ્તક્માં રહેલું પર્યાવરણ જ નહીં, આ બાળકોને આચરણ બાબતે એ શીખવવાનું છે કે સાચું શું? અને ખોટું શું? મને મારો જવાબ મળી ગયો, હવે એ વિધાર્થીઓ સુધી પહોંચાડવો જ રહ્યો.
અસ્તુ.
લેખક : ગોવિંદ પ્રજાપતિ
કામાવીરા પ્રા.શાળા

 

Share On Social Media

Author

Comments (506)

Leave a Reply

Your email address will not be published. Required fields are marked *