આજની પ્રાર્થના

હે ઈશ્વર તું મને એવું શાણપણ આપ કે હું યોગ્ય - અયોગ્યમાં ભેદ પારખી શકું. મને મારા જીવનની ક્ષણે ક્ષણની કિંમત છે તેથી, શું કરવું અને શું ના કરવું એની સમજણ આપ. કામ વગરનું અને સમય બગાડતું સઘળું મારાથી દૂર રાખ. જે ખરેખર કરવા લાયક ના હોય તેને ત્યજવાની પુરી હિંમત અને અમોઘ શક્તિ આપ. હે પરમકૃપાળુ પરમાત્મા તું મને ફાલતું વાતોમાંથી, આકર્ષક દૃશ્યોમાંથી, અર્થહીન વિચારોમાંથી અને સમય બરબાદ કરતી તમામ પ્રવૃત્તિઓમાંથી બચાવી લે. આ મારી તને નમ્ર અરજ છે તું મને સઘળાં ફોગટ કામોમાંથી તુરંત ખસેડી લે. ફક્ત ને ફક્ત મારાં અવતાર માટે અર્થપૂર્ણ હોય તેમાંજ પ્રવૃત્ત રાખ. હું વ્યર્થ કામોમાં વ્યસ્ત રહેવા નથી ઈચ્છતો. પ્રભુ તું મને એવી દિવ્ય દૃષ્ટિ અને સ્વચ્છ મન આપજે કે જેથી હું ફક્ત ને ફક્ત અર્થપૂર્ણ હોય તેને જ જોઈ શકું. હે પ્રભુ! મારાં અસ્તિત્વ માટે જે ખરેખર યોગ્ય હોય તેની મને અનુભૂતિ કરાવ કે જેથી તેમાં મારું સઘળું ન્યોછાવર કરી શકું. હે પ્રભુ હું તારી પાસે એવું શાણપણ ઈચ્છું છું કે તું મને માત્રને માત્ર શ્રેષ્ઠતમ અને ઉપયોગી વૃત્તિનું જ દર્શન કરાવ કેમકે હું મારાં મનુષ્ય અવતારને સંપૂર્ણ સાર્થક કરવા ઈચ્છું છું. યોગ્ય કામમાં કરેલી કુરબાની ક્યારેય એળે નથી જતી તેની મને બરાબર ખબર છે. જો તું મને આ વિવેક આપીશ તો મારો આ ભવ ફેરો લેખે થશે.

ભાવ – પ્રતિભાવો

“